ஹதீஸ் கலைக்களஞ்சியம்

நபி (ஸல்) அவர்கள் கூறினார்கள்:

தூய்மையின்றி எந்தத் தொழுகையும் (இறைவனிடம்) ஏற்கப்படாது; மோசடிப் பொருளால் செய்யப்படும் எந்தத் தர்மமும் ஏற்கப்படாது.

இதை இப்னு உமர் (ரலி) அவர்கள் அறிவிக்கிறார்கள்.³

இந்த ஹதீஸ் இரு அறிவிப்பாளர்தொடர்களில் வந்துள்ளது.

அவற்றில் ஹன்னாத் பின் அஸ் ஸரிய்யீ (ரஹ்) அவர்களது அறிவிப்பில், “தூய்மையுடன் தவிர எந்தத் தொழுகையும் ஏற்கப்படாது’’ என்று காணப்படுகிறது.

- அபூஈசா திர்மிதீ கூறுகிறேன்:⁴

இந்த ஹதீஸ், இப்பாடப் பொருள் தொடர்பான ஹதீஸ்களிலேயே மிகவும் ஆதாரபூர்வமானதும் அழகானதும் ஆகும்.⁵

இப்பாடப் பொருள் தொடர்பான ஹதீஸ், தந்தை (உசாமா) வழியாக அபுல்மலீஹ் (ரஹ்) அவர்களிடமிருந்தும் அபூஹுரைரா (ரலி), அனஸ் (ரலி) ஆகியோரிடமிருந்தும் அறிவிக்கப்பட்டுள்ளது.⁶

அபுல்மலீஹ் (ரஹ்) அவர்களின் தந்தையின் பெயர் உசாமா பின் உமைர் (ரலி) என்பதாகும்.

அபுல்மலீஹ் அவர்களின் இயற்பெயர் ஆமிர் என்பதாகும்; ஸைத் பின் உசாமா பின் உமைர் அல்ஹுதலீ என்றும் சொல்லப்படுகிறது.